Roma nuk di të ndalet, fiton ndeshjen e tetë radhazi në kampionat

Eliminimi i pësuar në Champions League nga Real Madrid duket se nuk ka ndikuar te lojtarët e Roma-s, të cilët kanë regjistruar fitoren e tetë radhazi në kampionatin italian pasi kanë mundur me rezultatin 2-1 skuadrën e Udinese në transfertë. Verdhekuqtë janë ngjitur në kuotën e 59 pikëve në renditje, vetëm dy pikë larg Napoli-t të vendit të dytë, që do të luajë sot në mbrëmje në fushën e Palermos. Dzeko dhe Florenzi kanë realizuar për romanistët, Fernandes ka shënuar golin e vendasve. Udinese – Roma Live Score Sulmuesi boshnjak ka zhbllokuar rezultatin në minutën e 15-të pas një asisti nga Salah. Skuadra e Spalletti-t ka realizuar 11 gola në pesëmbëdhjetë minutat e para të ndeshjes në këtë sezon, më shumë se çdo skuadër tjetër e Serisë A. Në minutën e 74-t ka ardhur edhe goli i dytë, që i ka siguruar tri pikët verdhekuqve, me Florenzi-n që ka shfrytëzuar në mënyrën më të mirë asistin e marrë nga Pjanic. Pesë minuta para fundit Udinese ka ngushtuar diferencat me Fernandes, i cili ka fiksuar shifrat në 2-1. Në ndeshjet e tjera të javës së 29-të të kampionatit italian, Fiorentina ka rimarrë vendin e katërt në dëm të Inter, pasi ka barazuar 1-1 me ekipin e Veronas, që mban vendin e fundit në renditje. Genoa ka fituar me përmbysje 3-2 ndaj Torino-s në shtëpi, teksa Carpi ka fituar 2-1 sfidën për mbijetesë me Frosinone.
Udinese – Roma 1-2 Shënues: Fernandes 85’/Dzeko 15’, Florenzi 74’
Udinese: Karnezis, Widmer, Danilo, Felipe, Adnan, Edenilson (Zapata 45’), Badu (Kuzmanovic 78’), Lodi, Hallfredsson, Bruno Fernandes, Thereau (Matos 72’). Trajner: Colantuono
Roma: Szczesny, Florenzi, Manolas, Zukanovic, Digne, Nainggolan, Keita, Salah, Perotti, El Shaarawy (Pjanic 70’), Dzeko. Trajner: Spalletti. Gjyqtar: Mazzoleni Kartonë të verdhë: Zapata/Nainggolan, Keita, Dzeko