Magani: Fitorja ndaj Laçit, dhurata për ditëlindje

Ndonëse në një transfertë të vështirë, skuadra e Teutës është rikthyer sot te fitorja, vetëm pak ditë pas humbjes së pamerituar të regjistruar në mesjavë ndaj Skënderbeut në transfertë. Fitorja e sotme 2-1 në transfertë ndaj Laçit, ka kënaqur pa masë trajnerin e durrsakëve Gugash Magani, jo vetëm për faktin se mban Teutën realisht në garë për vendin e tretë, por njëherësh edhe për faktin se mbërriti në ditën e lindjes së tij, madje duke patur për autor të njërit prej golave, vetë djalin e trajnerit Magani. Laçi-Teuta 1-2. “Kjo fitore ishte dhurata më e bukur për ditëlindje. Të fitosh në Laç nuk është aspak e lehtë, ndaj e vlerësoj maksimalisht këtë fitore. Në të vërtetë ne kemi fituar disa herë jashtë fushe, por njëherësh edhe kemi humbur sikurse ishin ndeshjet me Flamurtarin dhe Skënderbeun, ku në Vlorë nuk dhamë maksimumin dhe e pësuam, ndërsa në Korçë bëmë gjithçka shumë mirë por u ndëshkuam. Tani vijojmë garën me Kukësin dhe Tiranën. Vetëm fitorja na bënte punë sot, ndonëse edhe barazimi nuk do të kishte qenë dramë duke patur në konsideratë faktin që janë edhe shumë ndeshje. Më gëzuan të dy golat si i Johnatan ashtu edhe Maganit që kishte kohë pa shënuar. Uroj që kjo fitore të jetë një ogur i mirë për të dy sulmuesit që duhet të shënojnë”, përfundoi trajneri i Teutës, Gugash Magani.