Kreu i Partisë Demokratike, Lulëzim Basha do të bëjë një vizitë 5 ditore në SHBA, ku do të takojë zyrtarë të lartë të Departamentit Amerikan të shtetit si dhe kongresmenë amerikanë. Pjesë e delagcionit me Bashën do të jetë dhe deputeti kritik i Berishës, Eduart Selami së bashku me deputetët Genti Strazimiri, Jorida Tabaku si dhe këshilltari për politikën e jashtme, Mal Berisha.
Në axhendën e takimeve të kryetarit Basha në SHBA janë planifikuar takime me zyrtarë të lartë të Departamentit Amerikan të Shtetit dhe kongresmenë amerikanë.
Gjatë këtyre takimeve, kreu i PD-së pritet të theksojë problematikën shqetësuese me çështjen e dekriminalizimit në Parlament, situatën me reformën në drejtësi.
Vizita e Bashës në SHBA zhvillohet në kuadër të 25 vjetorit të rivendosjes së marrëdhnëieve mes dy vendeve , ndërsa në axhendën e takimeve është parashikuar edhe takim me grupin e miqësisë SHBA-Shqipëri.
Ndërkaq kryetari i PD po merr pjesë në takimin e organizuar nga Partia Popullore Europiane në Vienë ku vëmendje e veçantë do t’i kushtohet situatës në Ballkanin Perëndimor.
Gjithashtu diskutimet do të përqëndrohen edhe tek migracioni si dhe lufta kundër terrorizmit dhe radikalizmit. Në këtë takim marrin pjesë Presidenti i PPE Joseph Daul, Kryetari i Komisionit për Punët e Jashtme në Parlamentin Europian, Elmar Brok si dhe Ministra të Jashtëm të BE janë pjesëmarrës.
