Ashtu siç ishte paralajmëruar dhe një ditë më parë, sot ka nisur aksioni i pastrimit të Tiranës nga vullnetarë të kryeqytetit, një ditë para festës së ditës së verës.
Bashkisë së Tiranës i është bashkuar dhe kryetari i saj Erion Veliaj si dhe qytetar ku kanë filluar punën që mëngjesin e sotëm.
Veliaj mbajti një fjalim ku përmendi dhe protestuesit kundër parkut të lojërave tek Liqeni Artificia,l të cilët do të protestojnë edhe ditën e sotme, duke u bërë një thirrje atyre. “Nëse e doni mjedisin, natyrën, nëse i doni pemët, nëse e doni pastërtinë ejani në pastrim. Ta duash mjedisin vetëm me llafe, me të bërtitura, me protesta, nuk mjafton. Ai që e do e do me fakte, e do me punë”.
Për sa i përket nismës për pastrimin e Tiranës Veliaj tha se kjo mënyrë do të sensibilizojë edhe qytetarë të tjerë që të jenë më të kujdesshëm me mbetjet e tyre si dhe foli për landfillin e Sharrës.
“Problemi që kemi me bllokimin e kanalizimeve e kemi për efekt të bllokimit që vjen nga hedhja e mbeturinave.U bëj thirrje të gjithë qytetarëve që së pari të dalim sot të përdorim këtë kohë të bukur që na dha natyra për të pastruar, secili lagjen e vet, secili komunitetin e vet, secili poshtë pallatit të vet. Së dyti, të na ndihmojnë që të mos ndosim. Kemi zakon ndonjëherë që ja vëmë fajin armikut, këtë nuk na e bën armiku, nuk ka armik imagjinar.
Ndaj ftoj të gjithë qytetarët që të jenë më të kujdesshëm me mënyrën sesi trajtojnë mbetjet e tyre. Ndërkohë që këtë vit Bashkia do të fillojë një proçes gjigand që është proçesi i një landfilldi të ri dhe menaxhimi të ri plehrash në Sharrë që do të zgjidhë dhe një krizë që ka mbetur pezull në katër vitet e fundit, pa një vendimmarrje. Tashmë kemi marrë një vendim dhe bashkë me BB do të futemi në një proçes konkurimi publik për të ofruar zgjidhjen më të mirë të trajtimit të mbetjeve dhe mbeturinave në qytetin e Tiranës”.
