Kehm: Rikuperimi i Schumacher vijon ende i avashtë

Sabine Kehm, menaxherja e pilotit gjerman Michael Schumacher, pas disa javësh ka thyer heshtjen dhe ka folur për mediat në lidhje me gjendjen e 7 herë kampionit të botës. Ajo ka deklaruar se nuk ka asnjë lajm të ri në lidhje me gjendjen e pilotit gjerman, duke u shprehur se procesi i riaftësimit vazhdon. “Ky është një proces riaftësimi i gjatë dhe i vazhdueshëm. Nuk kam asnjë informacion tjetër për t’ju dhënë. Ne nuk duam të japim asnjë informacion, për të evituar spekulimet e mediave. Sa herë që themi diçka, fjalët tona bëhen pre e thashethemeve. Ashtu sikurse keni respektuar privatësinë e Schumacher kur ishte pilot respektojeni atë edhe tani”, ka thënë Kehm, duke mos dhënë detaje të tjera në lidhje me gjendjen e pilotit gjerman.