Institucionet shqiptare përgjatë vitit 2015 kanë rritur ndjeshëm tendencën për të zhvilluar tendera pa konkurrim dhe aspak transparente.
Kjo ngre dyshime për afera korruptive, pasi disa autoritete kontraktore kanë preferuar që të mos zhvillojnë konkurrim mes operatorëve por negocim pa shpallje paraprake.
Në total janë 2706 procedura tenderimi pa konkurrim për 2015 me një bilanc prej 8.6 miliard lekëve.
Në totalin e gjithë procedurave të zhvilluara nga Agjencia e Prokurimit Publik, kjo vlerë zë 11.8 % të fondit total. Pra, gjatë vitit të kaluar institucionet në vend kanë hapur mbi 4269 procedura prokurimi me një vlerë të përgjithshme prej 90.7 miliardë lekë.
Krahasuar me një vit më parë, kjo tendencë për të dhënë tendera pa konkurrim është rritur ndjeshëm.
Në vitin 2014, procedurat me negocim mes operatorëve dhe autoriteteve ishin në një vlerë më të ulët, rreth 5.6 miliardë lekë.
