Ish-kryeministri Sali Berisha ka reaguar pas ngjarjeve të dhunshme që përfshinë sot kryeqytetin shqiptar e që përfunduan me arrestimin e disa protestuesve. Berisha akuzon për dhunë ndaj qytetarëve, policinë bashkiake dhe atë të rendit, ndërkohë që deklaron se disa protestues janë arrestuar pa asnjë shkak.
Berisha shprehet i bindur se revolucioni demokratik ka filluar ndërsa kërkon lirimin e menjëhershëm të protestuesve të ndaluar.
“Edi Rama dhe Erjon Veliaj në panik nga shoqëria civile, rrahin, burgosin dhe dhunojnë protestuesit paqësor.
Të dashur miq, në fotot e mëposhtme mund të shihni vetëm një pjesë të dhunës dhe terrorit policor të ushtruar sot nga policia e Veliajt dhe nga çunat e krimit të Ramës dhe Saje qorrit, të cilët rrahin si shtazë, madje duke përdorur dhe elektroshok, qytetarët që po protestonin në mbrojtje të parkut të liqenit artificial nga kthetrat e Veliajt dhe Edvin betonit.
Ata kanë nisur arrestimet politike ndaj pjesëmarrësve të shoqërisë civile që protestuan kundër ndërtimeve te Liqeni Artificial. Janë mbi 5 qytetarë që ndodhen në komisariatin nr 1, aktivisti Zirkon Disha arrestohet për herë të dytë pa asnjë shkak ndërkohe që edhe avokati Altin Goxhaj, në një akt të pashembullt është ndaluar vetëm se po ju ofronte ndihmë juridike viktimave të terrorit të sotëm policor. Studentët dhe mbështetësit e protestuesve janë ulur në rrugën përpara ambienteve të këtij komisariati duke kërkuar lirimin e të gjithë të shoqëruarve për protestën e sotme.
Dhuna është elementi i fundit që i ka mbetur kësaj bande kriminale dhe që tregon se fundi i tyre po vjen me shpejtësi. Këta kanë arritur në pikën e moskthimit.
Dukë dënuar me ashpërsinë më të madhe aktet banditeske shtetërore ndaj shoqërisë civile, arrestimin e drejtuesve dhe mbështetësve të saj, kërkoj të lirohen menjëherë protestuesit dhe të ndalet dhuna ndaj shoqërisë civile. Unë gjithashtu shpreh bindjen se Revolucioni demokratik ka filluar. Qytetarët dhe shoqërinë civile nuk i ndalon dot gjë, as dhuna qeveritare, në permbysjen e kësaj qeverie!”, shkruan Berisha.
(Boldnews)
