Rusia paraqiti sot shqetësimet e saj serioze dhe bëri thirrje për përmbajtje, pas kërcënimit nga kreu i Koresë së Veriut për përdorimin e armës bërthamore si reagim ndaj rezolutës së OKB-së që rëndon sanksionet e imponuara ndaj Phenianit.
“Deklarata e Kim Jong Un ngjall një shqetësim serioz në Moskë”, tha për gazetarët zëdhënësi i Kremlinit, Dmitri Peskov.
“Ne shpresojmë se të gjitha vendet e rajonit, bashkë me vendet e treta, do të tregojnë përmbajtje në këtë situatë të vështirë”, shtoi ai.
“Gjatë një takimi me anëtarët e Këshillit të Sigurimit rus, presidenti Vladimir Putin foli për situatën jashtzakonisht të tensionuar për sa i përket Koresë së Veriut”, shtoi Peskov.
Kjo mbledhje u zhvillua nën sfondin e shqetësimeve ndërkombëtare të ngjallura nga propozimet kërcënuese të Kim Jong Un./
