Barcelona e drejtuar nga Luis Enrique vazhdon të bëjë histori, ka regjistruar 35 ndeshje pa humbje, në të gjitha garat, diçka e paarritur më parë në futbollin spanjoll. Në “Vallecas”, në sajë të fitores 5-1, skuadra e Luis Enriques ka vendosur edhe një rekord tjetër. Rekordi i mëparshëm në futbollin spanjoll qëndronte me 34 ndeshje, i mbajtur nga Real Madridi, në sezonin 1988-1989, me holandezin Leo Beenhakker si trajner. 27 vjet më vonë, blaugranët kanë eklipsuar rivalët e tyre të madh, duke arritur 35 ndeshje të pamposhtur.
Këtu përfshihen ndeshjet në La Liga, Kupën e Mbretit, Ligën e Kampioneve dhe Botërori për Klube. Në të ardhmen e afërt, ekipi i drejtuar nga Luis Enrique ka dy objektiva në këtë drejtim, përtej kampionatit spanjoll. Së pari, është rekordi i vendosur nga ekipi anglez, Nottingham Forest, me 40 ndeshje pa humbje në të gjitha garat, fundi i të cilit mbërriti në dhjetor të vitit 1978. Megjithatë, rekordi kryesor në të gjitha garat, në ligat kryesore europiane, u krijua nga klubi italian i Juventusit, në mes të majit 2011 dhe majit 2012.
“Zonja e Vjetër” shkoi deri në 43 ndeshje pa humbje në kampionat dhe në Kupën e Italisë, duke shënuar 26 fitore dhe 17 barazime. Barça tashmë ka 29 fitore, në një afat prej 35 ndeshjesh pa humbje. Këto 35 ndeshje përmbledhin këto të dhëna: 29 fitore dhe 6 barazime. Katalanasit kanë shënuar 105 gola dhe kanë pësuar vetëm 20 të tillë. Real Madridi i drejtuar nga Beenhakker kishte vendosur shenjën e tij me 25 fitore dhe 9 barazime, 85 gola të shënuar dhe 34 të pësuar.
