Nga Boldnews.al
Administrata publike shqiptare ka mbi 90 mijë persona të punësuar, por shumë pak prej tyre kanë pasur “fatin e mbarë” që të blejnë 3 shtëpi vetëm me rrogat e shtetit. Artan Bajrami, drejtues i Prokurorisë së Apelit për Krime të Rënda është një prej këtyre njerëzve, të cilit i ka ndritur fati që të kursejë aq shumë nga rroga shtetërore sa të ketë mundësinë për të shpenzuar mbi 200 milionë lekë (të vjetra) për apartamente banimi.
Sipas të dhënave të publikuara në “Open data”, Artan Bajrami ka qenë në pozicionin e drejtuesit të Prokurorisë së Apelit për Krime të Rënda që në vitin 2003, kur ka deklaruar për herë të parë pasurinë pranë Inspektoratit të Lartë të Deklarimit e Kontrollit të Pasurive dhe Konfliktit të Interesave (ILDKPKI).
Në deklaratën fillestare, Bajrami deklaron se ka në pronësi një apartament me sipërfaqe 11 m2, në Tiranë, blerë në vitin 2000, me vlerë 6.5 milionë lekë të reja. Si burim për blerjen e këtij aseti, prokurori ka deklaruar një kredi të butë në vlerë 5 milionë lekë, me interes 3%, si edhe pjesën tjetër e ka paguar në bazë të kursimeve familjare.
Në vitin 2006, prokurori Artan Bajrami deklaron se ka prenotuar një apartament me sipërfaqe 55 m2, përfshirë edhe një verandë sa dyfishi i banesës, rreth 110 m2, vetëm për 30 mijë euro. Në formularin e pasurisë nuk gjendet e deklaruar nëse ky apartament është në Tiranë apo në ndonjë qytet tjetër. Ai deklaron se ka parapaguar 20 mijë euro në momentin e nënshkrimit të kontratës së porosisë, të cilat janë krijuar nga kursimet e tij dhe bashkëshortes së tij ndër vite. Pjesa tjetër prej 10 mijë eurosh është deklaruar si detyrim, i cili, deri në vitin 2016, nuk rezulton i deklaruar si i shlyer.
Në vitin 2014, prokurori Artan Bajrami deklaron një investim serioz në aspektin e pasurive të paluajtshme. Ai deklaron se, në emër të të bijës, ka porositur një apartament 92 m2, si edhe një vend parkimi, vlera e të cilit shkon në rreth 10 milionë lekë të reja (saktësisht, 9.8 milionë lekë) të reja.
Sipas deklaratës së pasurisë, për blerjen e këtij aseti të çmuar, prokurori Bajrami ka paguar fillimisht 7.1 milionë lekë, të cilat janë siguruar nga kursime të pagat e tij, bashkëshortes së tij, specialiste në Ministrinë e Mirëqënies Sociale, si edhe të vajzës, specialiste në Ministrinë e Ekonomisë. Gjithashtu, ka deklaruar se, në totalin e paguar për këtë apartament ka marrë edhe një hua tek një person, në vlerën 20 mijë euro. Deri në vitin 2016, prokurori Bajrami deklaron se ka shlyer më shumë se gjysmën e detyrimit të mbetur për blerjen e apartamentit, sërish me burim nga pagat e familjarëve në sektorin shtetëror.
Në total, prokurori Artan Bajrami deklaron se, gjatë periudhës 16-vjeçare, 2000-2016, ka arritur të kursejë nga rrogat në shtet mbi 200 milionë lekë (të vjetra), të cilat më pas kanë shërbyer për blerjen e 3 apartamenteve.
