Për t’i dhënë pak më shumë pompozitet ambicjes së tij për reformën në administratën shtetëtore, kryeministri Edi Rama ka bërë ‘kurban’ drejtorin e ALUIZNI-t në Berat, pa u mbushur 24 orë nga dëgjesa publike në këtë qytet, ku për drejtorin pata ankesa nga një grua e moshuar.
Përmes një shënimi të gjatë në Fecebook Rama njofton se drejtori ia kreu sot në mëngjes legalizimin e shtëpisë gruas së moshuar, sipas porosisë që Kryeministri i kishte dhënë dje.
Rama i tha se nëse nuk i zgjidhte hallin gruas, do të largohej nga detyra. Por pavarësisht këtij kushtëzimi, duket se kryeministri e ka ndarë mendjen për ta shkarkuar nga detyra.
Ja çfarë shkruan ai:
“Sot, qysh në mëngjes njoftoi se legalizimi i shtëpisë së zonjës u krye. Tani lind pyetja: Po sikur dje zonja të mos e kishte pasur mundësinë ta ndante me mua hallin e saj, edhe sa vjet të tjera do të priste që drejtori të merrte masa ndaj torturuesve të saj dhe t’i dorëzonte lejen e legalizimit?! Nuk e di, po nuk është çudi që më parë të ikte nga kjo botë se sa të merrte lejen. Atëherë, ky drejtor që e zgjidhi problemin e saj brenda natës me kaq zell, duke dhënë provën se prej pesë vjetësh zonja ishte një viktimë e pafajshme e parazitëve (në rastin më të mirë) dhe grabitqarëve (në rastin më të keq), si mund të rrijë më në detyrë qoftë edhe një ditë pas kësaj prove turpëruese për shtetin?! Jo nuk mund të rrijë natyrisht, as ai dhe askush tjetër që ka lidhje me dosjen e hallit pesëvjeçar të zonjës! Drejtori mund të mos jetë personalisht pjesëtar i grupit që ka torturuar 5 vjet rresht të moshuarën, por fakti që në zyrën që ai drejton një grup i tillë ekziston e bën qamete të tilla, mjafton për të kuptuar se vetëm drejtor ai s’mund të jetë. Kjo është fare e qartë.