Reperi amerikan Tristian Hamilton, i cili njihet me emrin e artit si FBG Cash, është qëlluar për vdekje. Ai u qëllua brenda automjetit të tij në një lagje të Çikagos.
Me të në makinë ishte dhe një femër 29-vjeçare, e cila gjithashtu është plagosur dhe tani ndodhet në gjendje kritike. Emri i saj nuk është identifikuar në media.
Mediat e huaja raportojnë se autorët ishin me një makinë të zezë, kur ndaluan, dolën dhe hapën zjarr ndaj automjetit të FBG Cash. Më pas u larguan nga vendi i ngjarjes.
Ndërkohë policia po heton dhe po punon për identifikimin e autorëve të vrasjes.
Hamilton ishte pjesë e një grupi reperësh të njohur si “Fly Boy Gang”. Dy vite më parë, një tjetër anëtar i grupit, FBG Duck, u vra në mes të ditës në Gold Coast nga katër persona të maskuar.
