Nga Boldnews.al
Kandidatura e Bajram Begaj për President të Republikës është propozuar zyrtarisht nga 37 deputetë të Partisë Socialiste.
Numri i propozuesve është më i lartë se sa ai që kërkon Kushtetuta, 20 deputetë.
Në listën e propozuesve për Kreun e ri të Shtetit, e cila nis me kryeministrin Edi Rama e vijon me Elisa Spiropalin e Arben Ahmetajn, gjenden edhe emrat e të paktën 4 deputetëve që njihen më shumë për aktivitetin “jashtë-parlamentar” se sa për kontributin e dhënë në jetën politike.
Propozues për presidentin e ri janë, ndër të tjerë, deputetët Jurgis Çyrbja, Ilir Ndraxhi, Orlando Rakipi dhe Rrahman Rraja.
Jurgis Çyrbja
- Emri i deputetit Jurgis Çyrbja është përfolur në dosjen “Shullazi”.
Sipas përgjimeve të publikuara nga dosja hetimore e ish-Prokurorisë për Krime të Rënda, deputeti Çyrbja ka komunikuar të paktën dy herë në telefon me Gilmano Danin, krahun e djathtë të Emiljano Shullazit për çështjen e hotel Vollgës, e cila është rregjistruar në pronësi të Emiljano Shullazit nga Jurgis Çyrbja.
Në të dyja rastet, si shërbëtor besnik, deputeti Çyrbja, në atë kohë drejtor i Hipotekës Durrës, e informon Gilmano Danin për veprimet e prokurorisë.
Telefonata e parë u bë prej anëtarit të bandës në krye të Hipotekës menjëherë pas sekuestrimit të dosjes së hotel Vollgës nga prokuroria. “E kemi keq punën. Lidhet me detyrën time.”- janë fjalët e deputetit Çyrjbja në adresë të Gilmano Danit, i cili ka qenë në përgjim.
Telefonata e dytë mes të dyve është kryer menjëherë sapo ish kreu i hipotekës ka dalë nga Prokuroria e Krimeve të Rënda dhe i ka kërkuar takim, Gilmano Danit krahut të djathtë të Emiljano Shullazit.
- Ilir Ndraxhi
Emri i deputetit socialist të Durrësit, Ilir Ndraxhi, shfaqet në dosjen “339” të ish-Krimeve të Rënda, e njohur edhe si hetimi i “Bandës së Shijakut.
Në përgjimet e prokurorisë shqiptare, të publikuara nga gazeta gjermane “Bild”, rezultonin biseda të drejtuesve të grupit kriminal të Shijakut për favorizimin e Ilir Ndraxhit në garën për një post në Parlament.
- Orlando Rakipi
Orlando Rakipi ishte një prej “surprizave” të socialistëve në zgjedhjet parlamentare të Prillit të vitit 2021.
Ai u rendit emri i fundit në listën e Edi Ramës për Tiranën. Por, në mënyrë të habitshme, Orlando Rakipi arriti të thyejë herësin e votave, duke rezultuar ndër socialistët më të votuar në kryeqytet dhe siguroi një vend në Parlament.
Orlando Rakipi është djali i Aqif Rakipit, një ish-deputet aleat i Edi Ramës.
Aqif Rakipi është shpallur “non grata” nga Departamenti Amerikan i Thesarit. Qeveria amerikane e konsideron Aqif Rakipin si “një ish-deputet famëkeq nga Elbasani, Shqipëri, i cili ka ndikim të dëmshëm dhe destabilizues në proceset politike në Shqipëri…”.
Djali i Aqif Rakipit, Orlando, pati një shpërthim të fuqishëm votash, megjithëse nuk ka asnjë element të spikatur politik. Opozita beson se Orlando Rakipi fitoi mandatin e deputetit falë ndikimit të paligjshëm të babait të tij, Aqif Rakipi.
- Rrahman Rraja
Deputeti socialist i Krujës, Rrahman Rraja, është përmendur shpesh në kronikat policore. Jo për vepra të paligjshme të kryera prej tij, por për ato të rrethit të tij të afërt familjar.
Një i afërm i deputetit, Redjan Rraja, është aktualisht në gjykim, i akuzuar si pjesëmarrës në atentatin ndaj prokurorit të pezulluar të Durrësit, Arjan Ndoji. Në atë atentat mbeti i vdekur shoferi i prokurorit, Andi Maloku.
Një tjetër i afërm i deputetit Rrahman Rraja, i riu Ramazan Rraja, është i dënuar nga autoritetet belge me 8 vjet burgim, për përfshirje në trafik droge.
Djali i deputetit të Krujës, Rexhep Rraja, gjithashtu është përballur me drejtësinë, i akuzuar për dhunimin barbar të një vajze të re, Xhisiela Maloku.
