Breshëri plumbash dhe një shpërthim i fuqishëm prishi qetësinë e banorëve të Kamzës orët e para të kësaj të Martë.
Ngjarja e pari ndodhi pak pa mesnate. Zyrtarisht, policia njoftoi se në orën 00:20, në rrugën “Skënderbej”, u qëllua me armë zjarri në drejtim të një biznesi. Bëhet fjalë për një agjenci funerale në pronësi të Emriana Mukës. Dyshimet e para janë se autorët kanë ngatërruar objektiv. Kjo pasi pronarja e agjencisë së funeraleve është e divorcuar nga bashkëshorti prej rreth një viti e gjysme dhe ai ka hapur një biznes të ngjashëm përballë saj. Borxhet e pashlyera është një nga pistat ku po hetohet.
Pak më shumë se 30 minuta ndodhi ngjarja tjetër që prishi sërish qetësinë e banorëve. “Në orën 01:00, në bulevardin ‘Nënë Tereza’, në automjetin tip ‘Audi Q7’ dyshohet se ka shpërthyer lëndë plasëse. Si pasojë është dëmtuar mjeti dhe xhamat e një biznesi afër mjetit”, njoftoi policia.
Makina luksoze ishte në pronësi të Artan Lleshit. Dyshohet se ngjarja mund të jetë një paralajmërim që mund të lidhet me veprimtaritë e pronarit të makinës. Vetë Lleshi tha për mediat se ka dyshime se shpërthimi mund të lidhet me një ngjarje të ndodhur 22 vite më parë: “I vetmi dyshim që kam është që në vitin 2000 xhaxhai im ka vrarë një person dhe ka kryer dënimin”.
Për të dyja rastet, nuk ka autorë të identifikuar.
