Policia e Shkodrës ka parandaluar një ngjarje të rëndë kriminale, ndërsa ka vënë në pranga autorin si dhe ka bërë të mundur sekuestrimin e armës së zjarrit automatik.
Sipas asaj që bën të ditur policia e Shkodrës, rreth orës 19:00, në një lokal në lagjen “Mark Lula” Shkodër, është raportuar për një konflikt me armë zjarri.
Në vendngjarje kanë mbërritur shërbimet e policisë të cilët kanë konstatuar se, Arjan Gjeta, pas një konflikti për motive të dobëta me shtetasin E.P. 26 vjeç, banues në Shkodër, dyshohet se ka gjuajtur me armë zjarri në lokal ku ndodheshin edhe klientë te tjerë dhe është larguar, duke shkaktuar vetëm dëme materiale.
Policia, në bazë të njofimit të marrë dhe si rezultat i vlerësimit të ngjarjes, në kohë rekord bënë të mundur identifikimin, lokalizimin e tij dhe arrestimin në flagrancë të Arjan Gjetës, 42 vjeç, banues në Shkodër.
Gjithashtu gjatë kontrollit të ushtruar në banesë, iu gjet 1 armë zjarri automatike dhe 1 krehër me 8 fishekë, të cilat u sekuestruan në cilësinë e provës materiale.
Materialet proceduriale do ti referohen Prokurorisë së Rrethit Gjyqësor Shkodër për veprat penale “Vrasje e mbetur në tentativë” dhe “Prodhimi dhe mbajtja pa leje e armëve dhe muncioneve luftarake”.
