Përcaktohet trofeu i parë europian. Mbrëmjen e sotme në “Ramon Sanchez Pizjuan” të Sevilla-s do të luhet finalja e Europa League. Skocezët e Rangers sfidojnë Eintracht Frankfurt, me dy skuadrat që synojnë të kthehen te lavdia ndërkombëtare.
“Nuk ka asnjë dyshim që është ndeshja më e rëndësishme e karrierës, për të gjithë ne. Përtej këtij presioni, duhet të përqendrohemi maksimalisht te vlera që ka kjo finale për klubin dhe tifozët tanë. Është ndeshja më e rëndësishme në 50 apo 60 vitet e fundit për Eintracht-in. Luajmë me një rival të fort si Rangers, por duam të kthehemi në Frankfurt me kupën”, tha Oliver Glasner, trajner i Eintracht Frankfurt.
Pas Borussia Dortmund dhe Leipzig, skuadra nga Glasgou duhet të kalojë një tjetër pengesë gjermane. “Atmosfera është e shkëlqyer, jemi të emocionuar që mund të luajmë këtë finale. Ndeshje të tilla nuk krahasohen me të tjerat, pasi nevojitet shumë përqendrim. Erdhëm pak më herët në Sevilla për t’u ambientuar me vapën. Eintracht është një skuadër mjaft e organizuar, në lojën e tyre ka shumë ngjashmëri me Dortmund dhe Leipzig”, tha Giovanni van Bronckhorst, trajner i Rangers.
Nga kategoria e katërt, ku skuadra legjendare militonte në vitin 2012, në harkun e një dekade Rangers do të luajë finalen e Europa League. Kjo është ndeshja e dytë në histori për një trofe ndërkombëtar, pas humbjes në vitin 2008, kur trofeu quhet Kupa Uefa.
