Vincenzo Morrone, 43 vjeç ka rrëfyer vrasjen me dashje të 26-vjeçares me origjinë nigeriane Beauty Erahdor, e cila ishte një prostitutë, në Melzo, në zonën e Milanos, natën mes 1 dhe 2 tetorit 1999.
Sipas mediave vendase, gjithçka nisi pas një sherri mes dy bandave, asaj nigeriane dhe shqiptare, ku bënte pjesë dhe Morrone, për kontrollin e zonave të prostituimit dhe vrasja e Erahdor ishte si ‘një mesazh’ që shqiptarët donin t’i dërgonin bandës rivale. I lidhur me një klan shqiptar në atë kohë, pas krimit Morrone ishte larguar nga Italia për në Zvicër, kishte ndryshuar identitet dhe punonte si kuzhinier picash. I kërkuar tashmë në lidhje me një dënim me 17 vite burg për trafik ndërkombëtar droge, korrupsion, shoqërim kriminal, vjedhje dhe evazion, ai ka pranuar krimin pas arrestimit.
Dosja u ripah pas 23 vitesh pasi Morrone, tashmë i dënuar për krime të ndryshme, duke filluar nga vjedhja, mashtrimi dhe evazioni fiskal, rrëfeu të gjithë ngjarjen dhe pranoi autoriësinë e krimit. Sipas asaj që u tha nga i akuzuari, i dëgjuar në hetimin e prokurorit të Milanos Francesco De Tommasi, krimi i gruas kishte për qëllim të rregullonte ndarjen e territorit duke i dhënë një sinjal grupit të nigerianëve të cilët në atë kohë, në Rivoltana, shfrytëzonin disa gra të së njëjtës kombësi, duke i shtyrë ato të largoheshin nga ajo zonë dhe t’ua linin fushën të lirë shqiptarëve.
“Duhet të hedhim dikë në tokë”, kishte thënë një nga anëtarët e bandës shqiptare, më pas Morrone tregoi edhe për autorët e krimit, dy burra të cilët tregtonin drogë, mes tyre edhe një me origjinë shqiptare.
Për vrasjen e 26-vjeçarit, si fillim u arrestua një 30-vjeçar shqiptar dhe më pas u shpall i pafajshëm në shkallën e dytë të gjykimit.
Beauty Erahdor u vra natën midis 1 dhe 2 tetorit 1999 dhe trupi i saj u gjet në agim, e shtrirë në një korsi fshati afër provincës Cerca, jo shumë larg Rivoltanës. Ajo ishte qëlluar në pjesën e pasme të kokës, nga afër, nga një pistoletë e kalibrit 7.65, një armë model i vjetër i markës jugosllave e cila disa muaj pas krimit u gjet në Naviglio Martesana.
Ai u gozhdua edhe nga dëshmia e një tjetër prostitute, e cila teksa 26-vjeçarja po ndiqej dhe vritej atë natë, ndodhej në makinë me një klient, në errësirë, pak metra më tutje. Sulmet e tjera dhe të paktën dy vrasje të prostitutave, të cilat ndodhën në të njëjtat vite në atë zonë, u konsideruan më pas si pasojë e luftës për të kontrolluar rrugët e natës. Vrasjet e dy burrave, një shqiptar i gjetur i pajetë në parkun e Bisarca di Truccazzano dhe i një njeriu të dytë, të vrarë në Bergamo dhe më pas të “hedhur” në Rivoltana, i atribuohen gjithashtu gridjeve midis dy bandave.
