Deputetë të opozitës kanë kritikuar punën e qeverisë për luftën ndaj krimit të organizuar. Në mbledhjen e Këshillit Kombëtar të Integrimit Europian, deputeti demokrat Gazment Bardhi tha se Shqipëria ka bërë hapa pas në këtë drejtim.
“Krimi i organizuar është fuqizuar vitet e fundit. Kemi përfaqësues të krimit të organizuar që marrin miliona euro nga tenderat çdo vit. Marrin tendera publikë. Kemi eksponentët të krimit të organizuar që postojnë paratë në mes të Tiranës dhe nuk ka hetime”, tha deputeti i PD.
Por kritikat e Bardhit janë kundërshtuar nga ministri i Brendshëm, Bledi Çuçi.
“Zoti Bardhi ka tendencë për të nxirë realitetin. Shqipëria merr pjesë në operacione të përbashkëta kundër krimit të organizuar, kur vetëm pak vite më parë as informacione nuk merrte”, u shpreh ai.
Ministri i Brendshëm deklaroi se është forcuar bashkëpunimi me partnerët për të luftuar krimin e organizuar.
