Deputeti Ben Blushi ka reaguar ashpër pas deklaratave të kryeministrit Edi Rama sot në komunikimin javor ku mbrojti policinë dhe akuzoi bankat për sistem mizerabël sigurie.
Blushi e cilësoi jo për të parën herë Ramën si të paaftë.
Ai madje i tha kryeministrit se është bërë si ‘spikerët e komunizmit që çdo të diel flisnin kinezçe në Radio Tirana duke bindur popullin kinez se Shqipëria ishte kërthiza e fildishtë e botës kurse Kina vetëm barku i saj i boshatisur’.
STATUSI I BLUSHIT
Spikeri i radio kryeministrisë
I paafti thotë se fajin për vjedhjen e bankave e kanë bankat, fajin për ilaçet e skaduara e kanë të sëmurët, fajin për cilësinë e dobët të shkollave e kanë prindërit, fajin për korrupsionin e notave e kanë nxënësit, fajin për hashashin e kanë duhanxhinjtë, fajin për përmbytjet e kanë fshatarët, fajin për koncesionet e kanë bizneset, fajin për mjerimin e kanë të mjerët, fajin për zgjedhjet e kanë të tjerët, fajin për zgjedhjet në Amerikë e kanë meksikanët, fajin për trenin e kanë kosovarët, fajin për koalicionin e kanë grekët, fajin për integrimin e kanë gjermanët, fajin që durojnë e kanë shqiptarët. Duket si spikerët e komunizmit që çdo të diel flisnin kinezce në Radio Tirana duke bindur popullin kinez se Shqipëria ishte kërthiza e fildishtë e botës kurse Kina vetëm barku i saj i boshatisur!
