Raundi i parë për zhvillimin e zgjedhjes së Presidentit do të zhvillohet me 16 maj. Vendimi u mor në Konferencën e Kryetarëve, ndërsa seanca parlamentare do të mbahet në orën 17:00.
Konferenca e Kryetarëve vendosi që afati përfundimtar për dorëzimin e dokumentacionit do të jetë data 15 maj, ora 16:00.
Në mbledhjen e Kryetarëve pati diskutime lidhur me procesin, ku nga disa prej deputetëve të PD-së u hodh dyshimi, por edhe bindja, se socialistët e kanë zgjedhur tashmë emrin e Presidentit dhe procesi i negociatave thjesht po përdorej.
Kjo deklaratë u kundërshtua nga Elisa Spiropali, ministre e Shtetit, sipas të cilës në këtë proces nuk u vendos asnjë kusht nga ana e mazhorancës.
Deputetja Mesila Doda tha se procesi i zgjedhjes së Presidentit nuk mund të kalojë si një procedurë teknike, ndërsa Agron Gjekmarkaj u shpreh se pavarësisht se të gjithë flasin për Presidentin, nuk ka një proces.
Në 3 raundet e para, Presidenti mund të zgjidhet me 84 vota, ndërkohë që në raundin e 4 dhe 5, mjafton një shumicë e thjeshtë prej 71 votash.
