Përfaqësues të bizneseve në pedonalen “Kolë Idromeno” në qytetin e Shkodrës kanë dalë këtë të martë në një protestë.
Disa ditë pas lirimit të hapësirës publike nga Bashkia Shkodër, ato kërkojnë që të shfrytëzojnë përsëri këtë hapësirë.
“Unë përfaqësoj një biznes të vogël prej 6 vitesh në pedonale, kemi pasur kontratë të rregullt me bashkinë e Shkodrës, për shfrytëzimin e hapësirës publike në periudhave të caktuara. Ka 1-2 javë kohë që nuk kam qenë dakord për lirimin e hapësirave publike, por ne jemi të bllokuara dhe kërkojmë të marrim një shpjegim prej bashkisë së shkodrës si do të operojmë për sezonin turistik. Me këtë kapacitet, as çerekun e kapacitetit që kemi punuar më përpara, është e pamundur të përballojmë shpenzimet mujore që kemi qera drita ujë, punëtorë. Aktualisht e kemi punën e kufizuar”, tha ai.
“Përfaqësoj një bar restorant pasi kam 27 punëtorë aty. Mos shfrytëzimi i hapësirës publike ne jemi të mbaruar drejt falimentimit. Ne kërkojmë të shfrytëzojmë hapësirën publike ashtu sic ka qenë gjithmonë. Siç janë në gjithë botën evropiane, ashtu ta shfrytëzojmë dhe ne asgjë më shumë. Thjesht em shfrytëzu hapësirën publike dhe me vazhdu punëtorët punën ose ndryshe do të heqim punëtorët”, tha pronari i një biznesi.
Disa ditë më parë, rreth 17 subjekte u detyruan të lirojnë hapësirën publike në këtë pedonale pas urdhrit dhe aksionit të Bashkisë Shkodër.
