Kreu i Grupit Parlamentar socialist, Taulant Balla, ka reaguar lidhur me propozimet e bëra një ditë më parë nga deputeti Enkelejd Alibeaj lidhur me zgjedhjen e Presidentit.
Drafti i paraqitur nga Alibeaj është konsideruar nga Partia Demokratike si një lojë e Edi Ramës dhe si një marrëveshje e fshehtë mes tij dhe Lulzim Bashës.
Ndërkohë sot Balla tha se PS nuk ka mirëpritur pikën ku parashikohet që opozita të propozojë 4 emra kandidatësh për Presidentin e ri dhe mazhornaca vetëm 2.
Balla tha se mazhoranca nuk duhet të privohet nga e drejta për të propozuar.
“Ilir Meta ishte shembulli më i keq që mund të kishte Shqipëria. Propozimi i tyre është një propozim maksimalist, një propozim që i heq shumicës të drejtën të propozojë.
Megjithatë e përshëndes që ka një propozim. Ka një gatishmëri të grupit parlamentar të PD për tu ulur. Jemi të gatshëm që të ulkemi që nesër për të diskutuar propozimet tona dhe propozimet e tyre.
Kjo do të ishte zgjidhja e tyre. Me të përfunduar konferenca e kryetarëve nesër, të ulemi dhe të diskutojmë. Më duket pa vend që të vish në një tryeze dhe t’i thuash tjetrit ti nuk ke të drejtë të propozosh. Ne kemi qenë shumë të hapur dhe jemi shprehur që pjesë e propozimeve të jetë çdo qytetar shqiptar.
Nesër në orën 12:30 është njoftuar për konferencën e kryetarëve, nesër fillon zyrtarisht procesi deri në raundin e pestë. Dua të kemi një president të gjithë shqiptarëve jo president të PS. Nëse do e donim këtë, i kemi numrat dhe do ta zgjidhnim.
Propozimi që vjen nga PD është shumë i vlefshëm në rastin e zgjedhjes së avokatit të popullit, në rastin e zgjedhjes së avokatit e ka të drejtën të zgjedhë vetëm opozita”, tha Balla.
