Këngëtarja Ronela Hajati, e cila përfaqëson Shqipërinë në “Eurovizion 2022”, është një ndër pjesëmarrëset më të komentuara të kompeticionit.
Së fundmi LaRepubblica i ka dedikuar një artikull Ronelës dhe komenteve bullizuese duke bërë me dije se ‘Eurovision’ do marrë masa ndaj këtyre njerëzve.
Pasi u përball me fyerje, tallje, meme për pamjen e saj fizike, më pas u “censurua” nga kanalet zyrtare të komunikimit të “Eurovision” për pozat provokative, Ronela me ironi tha në konferencën për shtyp: “Eurovizion? Shfaqje familjare” teksa organizatorët e EBU (European Broadcasting Union) janë të detyruar të mbajnë qëndrim: diskriminimi në festivalin europian të këngës nuk do të tolerohet.
Paralelisht me sulmet ndaj Ronelës, në rrjetet sociale kanë nisur edhe kritikat ndaj EBU për mënyrën se si po menaxhon komunikimin.
Në një deklaratë publike EBU bën me dije: “Ne dënojmë fuqishëm të gjitha format e diskriminimit dhe jemi të tronditur nga niveli serioz i arritur nga abuzimi në internet që u është drejtuar atyre për të cilët punojnë fort për të prodhuar spektaklin e këtij viti.”
