Policia rrugore e Tiranës ka intensifikuar kontrollet në rrugët e kryeqytetit dhe në fokus duket se kanë qenë mjetet e shërbimit urban.
Policia bën me dije se qëllimi i këtyre aksioneve blic është evidentimi dhe ndëshkimi i drejtuesve të mjeteve që kryejnë shkelje agresive.
“Në këtë kuadër, gjatë 24 orëve të fundit, rëndësi e veçantë i është kushtuar kontrolleve të befasishme të drejtuesve të mjeteve të transportit publik, në linja të ndryshme të autobusëve, në kryeqytet. Ditën e djeshme i janë nënshtruar testit të alkoolit, 15 drejtues të mjeteve të transportit publik, me qëllim parandalimin e aksidenteve rrugore dhe për t’iu siguruar qytetarëve, një transport sa më të sigurt”, informon policia.
Në më pak se një javë, 3 urbane janë aksidentuar në Tiranë.
Aksidenti i parë u shënua më 29 prill, kur një autobus i linjës së Unazës së Re përfundoi në lumin e Lanës duke marrë poshtë vetes edhe një makinë. Vetëm 3 ditë më pas, më 2 maj, autobusi i linjës “Qytet Studenti- Rruga Jordan Misja” u përplas në stacion.
Aksidenti i fundit ndodhi më 4 maj. Autobusi i linjës “Kristal-Qendër” u përplas me një karrotrec në afërsi të “Stacionit të Trentit”.
