Është arrestuar mbrëmjen e djeshme Alfred Prodani, drejtori i Ujësjellësit të Kurbinit.
Arrestimi u krye nga policia për shkak të një mase sigurie të caktuar ndaj Prodanit nga Drejtësia Spanjolle.
Prodani, rezulton i përfshirë në rreth 40 episode vjedhje të banesave në Spanjë. Arrestimi i Prodanit u bë me qëllim ekstradimi drejt Spanjës.
“Në kuadër të operacionit policor të koduar ‘Coruna’, forcat policore të Komisariatit të Policisë Kurbin, në bashkëpunim me Interpol Tirana, kapën dhe arrestuan në qytetin e Laçit, me qëllim ekstradimi drejt Spanjës, shtetasin A.P., 41 vjeç, banues në Kurbin. Ky shtetas, ishte shpallur në kërkim ndërkombëtar, pasi Gjykata Coruna/Spanjë, në vitin 2013, ka lëshuar urdhër arresti ndërkombëtar, për veprën penale ‘Vjedhja me dhunë’, parashikuar nga Kodi Penal i Spanjës”, informoi sot policia e Lezhes.
Alfred Prodani ishte denoncuar pak kohë më parë dhe nga ish-kryeministri Sali Berisha, se kishte marë pjesë në grabitjen e shtëpisë së yllit të Real Madrit, Karim Benzema.
Akuzat e Berishës, Prodani i quajti në një reagim si të stisura dhe të motivuara politikisht.
