Një shpërthim i madh ndodhi më herët pasditen e së premtes në një pallat katërkatësh në periferi të Salamanca, në Madrid të Spanjës.
Shpërthimi, i cili ka shumë të ngjarë të jetë shkaktuar nga një rrjedhje gazi, ka lënduar 17 persona ku katër prej tyre janë transportuar në spital, njëri në gjendje të rëndë, ndërsa pjesa tjetër ka marrë ndihmën e parë në vendngjarje, duke pësuar lëndime të lehta.
Objekti është dëmtuar rëndë, ndërsa dëmtime të shumta ka edhe në automjete të parkuara aty pranë. Në zonën e bllokuar janë vendosur zjarrfikësit nga Madridi, shërbimi lokal i mbrojtjes civile dhe policia bashkiake.
Një zëdhënës i shërbimeve të urgjencës tha se zjarrfikësit po përpiqeshin të arrinin në banesën ku ndodhi shpërthimi, me një shkallë nga pjesa e përparme e ndërtesës dhe se ata kishin shpëtuar katër persona brenda.
“Për momentin ata po i japin përparësi kërkimit të viktimave të mundshme që mund të jenë brenda”, shtoi zëdhënësja.
Policia e qytetit të Madridit po rregullon trafikun në zonë dhe ka vendosur drone për të kapur imazhe ajrore. Pranë ndërtesës ndodhen dy shkolla, të cilat megjithatë nuk u evakuuan menjëherë.
“Nuk e dimë saktësisht se çfarë ka ndodhur. Fqinjët thonë se ka pasur një shpërthim të fortë, por ne po shqyrtojmë të gjitha rastet”, tha kryebashkiaku i Madridit, Jose Luis Martinez Almeida, i cili ka shkuar në vendngjarje.
