Për të tretën ditë radhazi, banorët e zonës pranë rrugës së Rinasit kanë protestuar kundër vendimit të ARRSH-së.
Më herët, Autoriteti vendosi që nga 1 Maji, rruga e Rinasit të bëhet me një sens lëvizje. Kjo masë, sipas autoritetit, vjen pasi fluksi i fluturimeve nga Rinasi është rritur me lehtësimin e masave anti-Covid dhe për shkak vonesave nga trafiku rrugor në këtë aks, ka pasur qytetarë që kanë humbur fluturimet.
Të Hënën dhe të Martën, banorët e zonës kanë dalë në protestë duke kërkuar që qarkullimi në këtë aks të kthehet sërish me dy sense lëvizje. Ata janë shprehur se qarkullimi vetëm me një senz i penalizon në përditshmërinë e tyre dhe rrit shpenzimet monetare.
Një ditë më parë, drejtuesi i ARRSH-së nuk mori parasysh kërkesën e banorëve, duke deklaruar se situata do të vijojë e njëjtë deri në një urdhër të dytë. Evis Berberi tha se banorët duhet të përdorin rrugët dytësore.
Por, sërish këtë të Mërkurë, banorët dolën në protestë duke kundërshtar vendimin e ARSH-së.
“Me zyrtarët nuk kemi pasur as bashkëbisedim, drejtori i ARRSH thotë që ka rrugë alternative, por nuk ka! Ne kërkojmë të vijmë te shkolla, në punë, kërkojmë të shkojmë te tokat bujqësore. Rruga që thotë ARRSH nuk zgjidh asgjë, është e njëjta situatë, unë nuk kam mundësi që të vij deri te rruga alternative. Këtu penalizohen jo vetëm 3 fshatra, penalizohen edhe njerëzit që duan të shkojnë në aerport. Nuk çojmë dot fëmijët në shkollë, na kanë mbetur mbjelljet pa asnjë lloj shërbimi. Ata janë treguar shumë indiferent, nuk kanë ardhur fare që të bisedojnë me ne. Nuk kërkojmë as sherre asgjë, ne duam që të shkojmë në punë”, tha kryeplaku i një prej fshatrave që shtrihet përgjatë rrugës së Rinasit në protestën e sotme.
Banorët protestuan për rreth dy orë dhe paralajmëruan se nëse autoriteti nuk tërhiqet nga vendimi, do të përshkallëzojnë protestat.
