Presidenti ukrainas Zelensky mbajti një fjalim me një video-lidhje me Kuvendin e Shqipërisë, ku kërkoi edhe kufizimin e turistëve rusë për sezonin turistik.
Presidenti i Ukrainës e nisi fjalimin me një urim për besimtarët myslimanë që festuan një ditë më parë Fitër Bajramin.
Më tej, ai foli për agresionin e Rusisë ndaj Ukrainës.
“Që nga 24 shkurti nuk kemi pasur asnjë ditë të paqtë. Rusia i ka shndërruar të gjitha ditët tonë në një rrezik vdekjeprurës. Dje në Odesa një djalë 14-vjeçar humbi jetën nga bombardimet ruse dhe një vajzë 7 vjeçare u plagos”, tha Zelensky.
Ai bëri me dije se gjatë luftës, janë vrarë 120 fëmijë dhe 420 të tjerë janë plagosur.
“Mariupoli është shkatërruar plotësisht. Nuk ka asnjë ndërtesë që ka ngelur”, u shpreh presidenti ukrainas, i cili tha se të tilla skena janë të pranishme në çdo qytet apo fshat të vendit.
Volodymir Zelensky u shpreh se ushtria ruse ka plaçkitur e vrarë njerëz të pafajshëm.
“Kanë plaçkitur gjithçka në territoret e pushtuara. Të moshuarit thonë se nuk kanë parë mizori të tilla dhe më parë tani po shohin ushtrinë ruse si qëllojnë fëmijët, janë zënë robër në fshatra. Në zonat e çliruara ne gjejmë varre masive, njerëz me duar të lidhura, me brinjë dhe krah të thyera. Shpesh herë prej tyre të qëlluar një pjesën më të madhe të kokës. Ushtria ruse nuk i la as të varrosen, por i la në rrugë”, tha Zelensky.
Zelensky falenderoi dhe Shqipërinë për pozicionimin krah Ukrainës. “Populli shqiptar më kujton Nënë Terezën”, tha Zelensky.
Po ashtu, presidenti i Ukrainës i bëri thirrje Shqipërisë që të kufizojë ardhjen e turistëve rusë në vendin tonë këtë verë dhe të mbyllë portet për anijet ruse.
“Unë besoj se duke punuar së bashku me të gjithë evropianët me përpjekjet tona të mira ne do jemi në gjendje të ndalojmë këtë luftë të zhvilluar nga Rusia. Të jemi në gjendje të mbrojmë Europën në të ardhmen me një përsëritje të një kërcënimi të tillë. Paketa e 6 e sanksioneve po diskutohet në BE, duhet të këmbëngulim se ajo përfshin embargon e naftës dhe bllokimin real të çdo skene që Rusia përdor për të mashtruar botën e lirë. Bankat ruse duhet të shkëputen plotësisht nga sistemi financiar global. Sado e vështirë të jetë, duhet të kufizohet qëllimisht tregtia me Rusinë. Ju kërkoj të mbyllni portet për anijet ruse, të kufizoni ardhjet për turistët rusë”, shprehet Zelenski.
“Faleminderi Shqipëri, lavdi Ukrainës”, e mbylli fjalimin Presidneti ukrainas, i cili mori dhe duartrokitjet e ligjvënësve.
