Banorët e zonës “Kodra e Priftit” në Tiranë i janë rikthyer protestave sot për shtëpitë që u rrezikohen të shemben për shkak të devijimit të Lotit të 4 të Unazës së Madhe.
Banorët u shprehën se ndihen të mashtruar, pasi bashkia por dhe ARRSH i kanë garantuar se banesat do t’ua legalizojnë dhe se nuk do të preket asnjëra, ndërkohë që sot u thonë që ato do të shemben.
Ata tregojnë se e gjithë kjo ndodh kur përkrah shtëpive, ka troje të lira ku mund të zbatohet projekti pa dëmtuar askënd. Sipas banorëve, qeveria nuk pranon që segmenti rrugor të devijohet në atë truall bosh pasi është në pronësi të një “oligarku”.
“Këtu kemi një tokë bosh. Nuk kemi ne pse të kërkojmë dëmshpërblimin, kur këtu ka një tokë bosh. Apo është e një oligarku ajo dhe nuk e prekin dot?! Ne kemi shtëpinë tonë. Të dëmshpërblejë këto 7 shtëpi dhe të devijohet rruga”, tha një protestues.
“Qarkullojnë fjalët që do ta bëjë Tom Doshi rezidencë. Të ndërtojë Tom Doshi këtu me shokët e vetë dhe ne të vdesim”, tha një banore.
Një tjetër vërejti: “Unë e kam blerë tokën me lekë edhe nuk e mora kështu, por e mora në atë gropën atje. Shpirti im e di si, thamë se do të legalizoheshim edhe ne dhe ikën 22 vite pa u legalizuar”.
“Më vjen keq që dëgjova Veliajn që tha se sa të jem unë dhe Rama, rrugët nuk ndryshojnë. Po mire, kur ia dhamë votën i pëlqeu atij?! E mori çunin të mbledhë njerëzit. Na premtoi me garanci se do të dëmshpërbleheni, ua jap me garanci. Po si nuk na ka ardhur një njëri?! Nuk e di si e vlerësojnë ata. Kur jam ankuar tek Avokati i Popullit, dhe më kanë sjellë letrën që më kap rruga. Ne duam që projekti të shkojë ku ka qenë. Vota nga ne nuk presin më. Edhe kalamajtë që janë kokë e këmbe më Edi Ramën, mos ta votojnë”, u shpreh një tjetër.
Akuza u lëshuan edhe ndaj kreut të Kadastrës Artan Lame. “Artan Lame tha” shteti e devijon rrugën, atëherë i bie tek a çift ndërto ti dhe ça fati të kesh. Mos u ngopshin”, tha një qytetare.
