Vazhdon pasiguria rreth asaj se deri kur vendi do të ketë furnizim të pandërprerë me gaz natyror, pas vendimit të kompanisë ruse për të ndërprerë furnizimin për Bullgarinë për shkak se refuzoi të paguajë gazin me rubla ruse. I vetmi gaz që përdoret në vend është gazi rus dhe deri më tani nuk ka asnjë vendim për zëvendësimin e tij, shkruan Alsat.
Autoritetet bullgare paralajmëruan zgjidhje deri në fund të kësaj jave dhe tashmë kanë filluar bisedimet me Azerbajxhanin për zëvendësim të mundshëm të gazit rus.
“Qeveria bullgare po punon për lidhjen e kontratave për furnizimit direkt me gaz. Për momentin po punojmë për furnizime nga Azerbajxhani, pasi çmimi sipas marrëveshjes së pezulluar është katër herë më i ulët se ai me të cilin ne marrim aktualisht gazin rus”, tha Lena Borislavova – shefe e kabinetit të kryeministrit bullgar
Bullgaria si vend tranzit është zgjidhja e vetme për gazin në Maqedoni derisa të ndërtohet centrali i gazit të paralajmëruar dhe impianti i gazifikimit Aleksandropolis në Greqi. Liderët e vendeve të rajonit, ndër të cilët edhe kryeministri Kovaçevski, të martën së bashku me kryetarin e Këshillit Evropian Çarls Mishel, do ta zyrtarizojnë ndërtimin e terminalit, i cili pritet të përfundojë për 20 muaj.
“Projekti do të ofrojë burime dhe rrugë të reja për furnizim me gaz natyror dhe do të rrisë sigurinë e furnizimit në Greqi, Bullgari dhe vende të tjera të rajonit”, tha Çarls Mishel, kryetar i Këshillit të Evropës
Me lidhjen e gazit me Greqinë fqinje, vendi nuk do të jetë më i varur vetëm nga gazi rus. Konsumi mesatar i gazit natyror për një vit në vend është rreth 400 milionë metër kub, i cili në masë më të madhe shpenzohet kryesisht për nevojat e ngrohjes qendrore në dimër. Që nga fillimi i vitit deri më tani janë importuar rreth 130 milionë metër kub gaz natyror.
