Superliga shqiptare rikthehet këtë mesjavë për të përcaktuar ndoshta edhe fituesin e kampionatit. Java e 32 nis me një sfidë spektakolare, pasi në “Kukës Arena” vendasit do të presin Partizanin.
90 minutëshi i kësaj të marte pritet të vendos jo pak për fatin e dy ekipeve, kandidat për një biletë për Kupat e Europës sezonin e ardhshëm. Skuadrat numërojnë pikë të njëjta në renditje, 46 dhe një fitore do i afronte akoma dhe më shumë me objektivin.
Tirana mund të shpallet kampione e vendit për herë të 26 në histori në përfundim të përballjes me Teutën për të shkurorëzuar durrsakët si mbajtësit në fuqi të titullit.
Bardhebluve i duhet medomosdo fitorja për të mbyllur llogaritë e një kampionati të dominuar prej tyre. Po të mërkurën zhvillohen edhe dy përballje tepër të rëndësishme, si ajo mes Egnatias dhe Laçit e Skënderbeu-Kastrioti.
Korçarët duhet të shmangin humbjen për të shpresuar mbijetesën, mision tepër i vështirë për skuadrën e teknikut Skënder Gega. Java e 32 mbyllet të enjten, me një sfidë tepër të bukur, pasi masin forcat Dinamo dhe Vllaznia. Edhe për kryeqytetasit ky duel mund të përcaktojë jo pak fatet e sezonit.
