Partia Demokratike shpalli sot zyrtarisht listën me emrat e anëtarëve të rinj të Këshillit Kombëtar, që i bashkohen deputetëve dhe drejtuesve të degëve, të cilët u zgjodhën nga anëtarësia e PD në javët e fundit.
Në listën e kandidatëve ishin 420 emra, prej të cilëve vetëm 150 arritën të marrin votat e nevojshme, referuar informacioneve zyrtare.
Jashtë listës kanë mbetur analistët dhe gazetarët Agim Baçi apo dhe Fitim Zekthi si dhe moderatorja Ori Nebiaj e cila më 25 prill kandidoi edhe për një mandat deputeti. Gjithashtu jashtë listës kanë mbetur edhe ish-futbollistët Gentian Muça dhe Andi Lila të cilët nuk janë rizgjedhur nga delegatët e Kuvendit të 30 prillit.
Po ashtu nuk është zgjedhur as këshilltari për çështjet ligjore në Partinë Demokratike Marash Logu, por edhe personazhe të njohur si Ahmet Prençi, Roland Bejko, Salvador Kaçaj, Selami Xhepa. Gjithashtu si anëtarë të Këshillit Kombëtar nuk janë zgjedhur as Silvi Bardhi, Patrik Sadikaj e Vehap Kola.
Por Këshillit Kombëtar i janë rikthyer Rudina Hajdari, Arben Imami, Myslim Murrizi e Aldo Bumçi. Anëtar i Këshillit Kombëtar është zgjedhur edhe Fatbardh Kadilli, i njohur si kritik ndaj Sali Berishës e Lulzim Bashës po ashtu. Ndër emrat e zgjedhur janë edhe Osman Mula, Bujar Kapexhiu, mjeku Ilir Alimehmeti, studiuesi Apollon Baçe.
