Nga Boldnews.al
Enivled Aliaj, 37-vjeçari i shumëkërkuar prej 9 prillit, i cili plagosi me 5 thika 29-vjeçarin Dino Majko në një nga lokalet në shëtitoren e Sarandës, mesa duket një muaj para ngjarjes ishte lënë i lirë nga Gjykata e Sarandës. Por jo vetëm kaq, i plagosuri rezulton të ketë patur tjetër konflikt me 29-vjeçarin në muajin mars dhe sërish ishte ndjekur në gjendje të lirë.
Kështu në Gjykatën e Apelit Gjirokastër, në 28 prill është riregjistruar kërkesa penale: “Vleftësimin e ligjshëm të arrestit në flagrance të shtetasit Enivled Aliaj. Caktimin e masës së sigurimit “arrest në burg”. Çështja do të shqyrtohet nga Gjyqtari Sokol Pina dhe mesa duket ka të bëjë me një masë më të lehtë sigurie të vendosur nga Gjykata e Sarandës në 13 mars të këtij viti, e cila ka lënë të lirë Enivled Aliajn, 37-vjecc, i arrestuar ky për një ngjarje e cila rezulton të mos jetë bërë publike nga policia. Pra vetëm një muaj para se të kryente plagosjen, i shumëkërkuari ka qenë i arrestuar, por është lënë i lirë nga Gjykata dhe tashme Apeli kërkon masë sigurie izoluese për të për ngjarjen ende të mistershme. Çështja nga Gjyqtari Sokol Pina do të shqyrtohet në 5 maj ora 11.15 në Gjykatën e Apelit Gjirokastër.
Përpos kësaj, një tjetër ngjarje është zbuluar e kryer nga Enivled Aliaj po në mars dhe ndoshta 1 ose 2 ditë para se të arrestohej për veprën për të cilën u la i lirë. Në 9 mars policia deklaroi se kishte ngritur akuzë në gjendje të lirë për Enivled Aliajn, 37-vjecc për “shkatërrim prone” pasi 29-vjecari Dino Majko kishte denoncuar se Aliaj i kishte dëmtuar gomat e makinës.
Zbulimi i këtyre dy ngjarjeve tregojnë paaftësinë e policisë dhe gjyqësorit në Sarandë për të parandaluar tentativën e vrasjes së 9 prillit në Sarande, ku Dino Majko u qëllua në mënyre të pamëshirshme disa here me thikë në sy të dhjetëra klientëve e pushuesve nga 37-vjeccari Enivled Aliaj, të cilin policia as sot nuk ka arritur ta kapë.
