Rreth 600 stjuardë do të punojnë për mbarëvajtjen e finales s 25 majit në Tiranë. Prej disa muajsh, më saktësisht që prej tetorit, UEFA në bashkëpunim me palën shqiptare, po punojnë për trajnimin e të gjithë stjuardëve që do të instalohen në perimetrin e “Air Albania Stadium”.
Siguria është kryefjala e kërkesave të institucionit të futbollit europian, duke parë edhe precedentët e ndeshjes me Poloninë por edhe trazirat në derbi dhe në këtë aspekt po punohet për t’u finalizuar të gjitha përgatitjet deri në datën 10 maj.
Disa kompani private do të bashkëpunojnë për të siguruar numrin e nevojshëm të njerëzve që do të vendosen në hyrjet e stadiumit për kontrollet e rrepta dhe ata që do të ruajnë rendin në shkallët e “Arenës” ku do të akomodohen 21 mijë njerëz, 8 mijë tifozë të të dyja skuadrave, 8 mijë aplikantë të ndryshëm dhe 5 mijë të akredituar nga UEFA.
Stjuardët do të kujdesen për sigurinë në stadium, hyrjet e kontrollit të biletave dhe pjesën rrethuese të perimetrit, ndërsa Policia e Shtetit do të punojë për të siguruar një rreze edhe më të gjerë përreth stadiumit pasi finalja e Ligës së Konferencës konsiderohet një eveniment i përmasave botërore, aq më tepër që po zhvillohet për herë të parë dhe është pikërisht Shqipëria që ka pak eksperiencë në të tilla organizime.
Drejtuesit e operacioneve të sigurisë dhe Policia e Shtetit, do të kontaktojnë nga afër edhe me përfaqësues të vendeve të dy skuadrave finaliste për të marrë informacione më të detajuara por kjo do të ndodhë vetëm pasi të jenë caktuar skuadrat që do të vizitojnë Tiranën.
