Komisioni i Rithemelimit zhvilloi një mbledhje mbrëmjen e së mërkurës, ku u diskutua lidhur me Kuvendin Kombëtar të 30 prillit dhe zhvillimet e pritshme, përfshi edhe datën e mbajtjes së zgjedhjeve për kreun e Partisë Domokratike.
Sali Berisha në një deklaratë për mediat pas mbledhjes i bëri thirrje të gjithë të larguarve nga PD që të bashkohen në Kuvendin Kombëtar të 30 prillit.
Sipas ish-kryeministrit, Komisioni i Rithemelimit do të drejtojë Partinë Demokratike deri në momentin që zgjidhet kryesia e PD nga Këshilli Kombëtar pas Kuvendit të 30 prillit.
“Kuvendi do vijojë të autorizojë Komisionin e Rithemelimit që të funksionojë deri në ditën e zgjedhjes së kryesisë së PD. Kur të zgjidhet kryesia e PD pushon së ekzistuari Komisioni i Rithemelimit. I bëj thirrje të gjithë të larguarve nga PD që të bashkohen më 30 prill”, tha Berisha.
Pyetje: Zoti Berisha, kur do e shpallni kandidaturën tuaj për kryetar të PD?
Berisha: Besoj se pothuajse e kam shpallur por Kuvendi do të formalizojë datën dhe një nga ditët e ardhshme do ju ftoj.
Pyetje: Zgjedhjet për kryesinë e PD do jenë para zgjedhjes së kryetarit apo pas?
Berisha: Para, para. Kryesia e PD zgjidhet nga Këshilli Kombëtar, Këshilli Kombëtar zgjidhet nga Kuvendi, pastaj ai zgjedh kryesinë. Nënkryetarët e Partisë Demokratike dhe Sekretarin e Përgjithshëm i zgjedh Këshilli Kombëtar me votë të fshehtë me dy kandidatura.
Pyetje: Sa i takon Këshillit Kombëtar, a do ketë një prezantim publik të listës që do i dërgohet Kuvendit dhe në këtë listë nga verifikimi që keni bërë a ka emra që rikthehen në PD, figura të rëndësishme që në 8 vitet e fundit janë larguar?
Berisha: Ka emra të tillë. Në këto lista është përshembull Arben Imami, Jozefina Topalli kthehet ex officio. Ka një ftesë në Kuvend për zonjën Bregu, edhe zoti Patozi, edhe Rudina Hajdari që u largua dhe u kthye. Të gjithë ata të cilët për një motiv a një tjetër u larguan janë të mirëpritur.
Pyetje: Po në dy degët ku ende nuk janë zhvilluar zgjedhjet, dega 12 në Tiranë dhe në Malësinë e Madhe?
Berisha: Delegatët janë zgjedhur mos gaboj. Nëse nuk janë zgjedhur, ato në 72 degë flasin. Vendimet për zgjedhjet në degë nuk i merr Komisioni i Rithemelimit, por statutor, Komisioni i Operacioneve Elektorale.
Pyetje: Pas datës 30 prill deri më 21 maj ku planifikohen zgjedhjet për kryetarin, kush do e drejtojë PD-në, Komisioni i Rithemelimit?
Berisha: Mendoj që Kuvendi do autorizojë Komisionin e Rithemelimit të funksionojë deri ditën e zgjedhjes së Kryesisë së Partisë Demokratike. Pasi të zgjidhet kryesia e Partisë Demokratike pushon së ekzistuari Komisioni i Rithemelimit.
