Deputeti demokrat, Edmond Spaho ka qenë i ftuar në emisionin “Pushteti” në Fax News, ku ka folur mbi situatën brenda PD-së në prag të mbajtjes së kuvendit të 30 prillit.
Spaho ftoi të gjithë demokratët të merrnin pjesë në këtë kuvend pavarësisht se cilit fraksion i takojnë, ndërsa përsëriti se ankimimi i vendimit të gjykatës për njohjen e kuvendit të 11 dhjetorit, ishte i paligjshëm për faktin se fraksioni i përfaqësuar nga Alibeaj nuk ishte palë në proces.
Spaho: Deri më sot, këto 8 muaj jemi marrë me veten. Kuvendi i 30 prillit do të jetë edhe një mundësi më shumë për të gjithë ata të cilët dëshirojnë t’i bashkohen këtyre përpjekjeve për bashkimin e partisë Demokratike. Ftesa është për të gjithë pavarësisht se në cilin fraksion janë pozicionuar.
Shpresoj që kësaj thirrje t’i përgjigjen të gjithë dhe veçanërisht shpresoj që grupi parlamentar të kaërcejë këto probleme.
Pyetje: Alibeaj nuk po dorëhiqet nga ankimimi i vendimit të gjykatës për njohjen e kuvendit të 11 kuvendit.
Spaho: Kjo nuk është çështje gjykatash, është çështje e anëtarësisë që u shpreh në 18dhjetor dhe mbështetësit e djathtë u panë në 6 mars. Edhe pakica sigurisht duhet të gjejë vendin e saj në këtë organizim politik. Ankimimi në gjykatë i vendimit është tërësisht anti-ligjor për vetë faktin se pala që është ankuar, nuk është palë në proces. Kjo është një kërkesë e bërë nga Komisioni i Rithemelimit dhe si i tillë vetëm ky grupim ka të drejtën të bëjë ankimimin e vendimit nëse nuk është dakord me vendimin e gjykatës.
