Elisa Spiropali, ministre e Shtetit për Marrëdhëniet me Parlamentin, u shpreh në emisionin “Të Paekspozuarit” se incineratorët ishin një nismë që duhej të ndërmerrej pasi vendi po mbytej nga plehrat.
Spiropali tha se Partia Socialiste i dha vendit drejtësinë e pavarur, ndërsa nuk merrte përsipër të deklaronte nëse kishte abuzime dhe kush duhej të përgjigjej lidhur me aferën e inceneratorëve.
Ajo tha se vendimi për inceneratorët u mor në kushtet e një emergjence mjedisore, por ajo nuk ishte në gjendje të jepte sqarime, nëse këto inceneratorë apo impiante, janë në punë ose jo.
Spiropali tha se impianti i Elbasanit ka punuar dhe ka prodhuar energji deri në momentin e sekuestrimit, por nuk ishte në gjendje të thonte nëse sot a ka ndonjë prej impianteve që djeg plehra dhe prodhon energji.
“Nuk di të them për sot, janë procese që janë për disa vite. Incenerimi është një tjetër proces, ato janë impiante”, tha Spiropali, duke bërë lojra fjalësh.
Ministrja e Ramës tha se SPAK po heton lidhur me çështjen, por e konsideroi të papranueshme që Prokuroria Speciale nuk po heton lidhur me ish-Kryeministrin Sali Berisha përsa i takon shpalljes “non grata”.
Ajo pranoi faktin se Komisionet Hetimore në Shqipëri nuk prodhojnë asgjë, ndërsa shtoi se lidhur me inceneratorët u bë një show.
Gjatë debatit në emision, Spiropali tha se përgjegjësinë duhet ta mbajë individi. “Unë s’mund të shpall Alqi Bllakon fajtor, as ndonjë tjetër, pasi duhet t’a shpallë Gjykata”, u shpreh Spiropali.
