UEFA do të limitojë në tre numrin e mandateve të drejtuesve të saj, bëri të ditur presidenti i saj, Aleksander Ceferin, të enjten në Nyon (Zvicër), gjatë një mbledhje të Komitetit Ekzekutiv të instancës evropiane të futbollit.
“Kam premtuar reforma të ndryshme në drejtimin e instancës që kur jam zgjedhur”, theksoi slloveni, që zëvendësoi në fund të shtatorit të kaluar Michel Platini. “Një propozim është që presidenti dhe anëtaret e Komitetit Ekzekutiv të kenë maksimumi tre mandate prej katër vjetësh”, ka deklaruar ai.
Kjo reformë do të diskutohet në Kongresin e 41-të të UEFA-s më 5 prill në Helsinki (Finlandë). Deri tani, i vetmi limit për drejtuesit e UEFA-s ka qenë mosha. Një drejtues nuk mund të zgjidhet nëse i kalon 70 vjetët.
