Qeveria dhe Bashkia e Durrësit pritet që të nisin punën për ndërtimin e një shëtitoreje buzë detit nga Ura e Dajlanit deri tek Kavalishenca. Kjo u bë e ditur përmes një postimi në rrjetet sociale të një videoje nga Rama, të një takimi që zhvilloi me kryetaren e Bashkisë së Durrësit Emiriana Sako.
Gjatë takimit, u tha se projekti do të ketë një gjatësi prej rreth 3 km dhe parashikohet që me ndërhyrjen të ketë zgjerim të brezit të rërës, ndërsa punimet pritet të nisin pas përfundimit të sezonit turistik të këtij viti dhe para nisjes së sezonit turistik të vitit 2023.
Nuk u bë e ditur se sa do të jetë fondi për këtë projekt dhe as nëse do të ketë prona që preken.
“Do të rritet vlera e apartamenteve dhe hoteleve në vlerë, do i bashkangjitet dhe portit të ri turistik që është ende në fazën e negocimit me Emiratet Arabe dhe së shpejti do të jetë në ndërtim. Do bëhet me zgjerimi ne rërës dhe jetën e natës që mos thonë durrsakët që mbetëm pas Vlorës, duhet ta detajojmë deri në fund me kujdes dhe duhet ta shikoni në realitet para çdo godine si është situata duhet të flasim me pronarët e hoteleve që kjo është vlerë e shtuar. Me mbarimin e këtij sezoni në vjeshtë të fillojë puna, do ta shikojmë nëse do ta ndajmë me faza. Brenda këtij mandati ky të kthehet në plazh model. Të bëjmë edhe ndërhyrje në det. Ta bëjmë me shqiponjë në det”, tha Rama.
