Gjykata Administrative e Rrethit gjyqësor Durrës ka rrëzuar vendimin e kryebashkiakes Emiriana Sako për të liruar nga detyra ish-nënkryetarin e bashkisë, Arbër Braho.
Ky vendim, i cili nuk është zbardhur ende, është dhënë më 20 Prill.
Mësohet se gjykata e ka vlerësuar të paligjshëm dhe me shkelje të procedurave administrative lirimin nga detyra të nënkryetarit Braho.
Në datën 9 nëntor 2021, kryetarja Emiriana Sako vendosi lirimin nga detyra të nënkryetarit Arbër Braho, pas akuzave publike të këtij të fundit në lidhje me abuzimet në tendera dhe jo vetëm të institucionit të qeverisjes vendore.
Braho e akuzoi kryetaren Sako për vjedhje fondesh, teksa deklaronte se fondet e bashkisë administrohen nga ish-kryetari Vangjush Dako.
Disa ditë pas akuzave, u largua nga detyra nga Sako, e cila u konfirmua kryebashkiake në zgjedhjet e pjesshme lokale të 6 Marsit.
Sako nga ana tjetër, ka mohuar se e ka hequr nga detyra Brahon për shkak të akuzave publike ndaj saj.
