Deputeti i PD-së, Edmond Spaho, akuzoi nga foltorja e Kuvendit se po cënohet liria ekonomike me akte normative. Spaho tha se duhet ti jepet fund prekjes së lirive të qytetarëve me akte normative nga Qeveria.
“Kuvendi është kthyer në një shtojcë të qeverisë. Në kohën e pandemisë ishim i vetmi vend që qytetarëve i kufizoheshin liritë me akte normative, dhe jo me ligje. Akti normativ nuk është ligj. E dini ju se nesër qeveria mund të sjellë një akt normativ që ndalon protestat për 45 ditë, apo që të mbyllen mediat online për 45 ditë. Çfarë do të bëni ju”, tha Spaho, duke iu drejtuar deputetëve.
Në vijim ai tha se edhe përcaktimi i çmimeve në treg po bëhet me akte normative dhe çfarë po ndodh, sot karburantet janë më të larta se çmimet e bursave.
“Shikoni bursat në ditë të caktuara, shikoni edhe çmimet në Shqipëri, nuk zgjidhet kjo situatë as me borde as me akte normative. Kjo situatë zgjidhet duke zgjidhur qesen qeveria”, tha Spaho.
