Dy aksidente ka shkaktuar një 30-vjeçar në Tiranë, nën drejtimin e një “Toyota Yaris”, para se të arrestohej nga policia.
Burime zyrtare bënë me dije se në pranga u vu D.H., 30 vjeç, për veprat penale “Shkelja e rregullave të qarkullimit rrugor”, “Largimi nga vendi i aksidentit”, “Mosbindja ndaj urdhrit të punonjësit të policisë së rendit publik” dhe “Kundërshtimi i punonjësit të policisë së rendit publik”.
Sipas bluve, efektivët kanë konstatuar një automjet në bulevardin “Gjergj Fishta”, drejtuesi i të cilit nuk rregullonte shpejtësinë në zonat e banuara dhe përdorte aparatin celular gjatë drejtimit të mjetit. Duke vlerësuar riskun që ai paraqiste duke drejtuar mjetin në mënyrë jo të rregullt, i kanë bërë shenjë ndalimi, por drejtuesi nuk i është bindur dhe ka vazhduar lëvizjen.
Efektivët e Policisë janë vënë në ndjekje të makinës, drejtuesi i të cilit gjatë tentativës për t’u larguar ka aksidentuar shtetasin D.B., 61 vjeç, në afërsi të shkollës “Vasil Shanto” dhe më pas në rrugën “Sulejman Delvina”, ka përplasur një mjet tip taksi dhe është larguar.
Në afërsi të ish-sheshit “Shqiponja”, shërbimet e Policisë kanë bërë të mundur ndalimin e automjetit, drejtuesi i të cilit, pas testit të alkoolit, ka rezultuar në gjendje të dehur.
