Një efektiv policie ka mbetur i plagosur në një aksident rrugor në kryeqytet.
Sipas policisë, oficeri është përplasur nga një automjet tip “Ford”, që më pas është larguar nga vendngjarja. I lënduari raportohet se ndodhet jashtë rrezikut për jetën.
“Në rrugën ‘Thoma Koxhaj’, mjeti tip ‘Ford’, në pronësi të shtetases D.M., me drejtues ende të paidentifikuar, ka goditur punonjësin e Policisë Z.M., me detyrë Oficer i Patrullës së Përgjithshme, dhe është larguar. Si pasojë punonjësi i Policisë është dëmtuar dhe ndodhet në spital, jashtë rrezikut për jetën”, njoftoi policia.
Grupi hetimor po punon për identifikimin dhe kapjen e drejtuesit të mjetit dhe sqarimin e rrethanave të ngjarjes, shtuan të njëjtat burime.
