Kërkesa e ish -deputetit të LSI -së Shkëlqim Selami për pezullimin e heqjes së mandatit të tij nga KQZ -ja është rrëzuar nga Gjykata Administrative.
Më 29 dhjetor, KQZ-ja mori vendim që “të shpallë të pavlefshëm dhe përfundimin e parakohshëm të mandatit të deputetit, z. Shkëlqim Selami. Ky vendim hyn në fuqi menjëherë dhe botohet në Fletoren Zyrtare. Kundër këtij vendimi mund të bëhet ankim sipas ligjit. Për këtë vendim, të gjithë anëtarët e KQZ-së kanë qenë unanimë.”
Shkëlqim Selami ishte pre e ligjit të dekriminalizimit. Rezultoi se ai nuk ka deklaruar në formularin e dekriminalizimit, të dhënat për një masë sigurie arrest me burg nxjerrë ndaj tij nga Gjykata e Brindizit si i dyshuar për pjesëmarrje në organizatë kriminale që merrej me trafikim të qënieve njerëzore. Masa ndaj tij është dhënë në 1994 dhe është ekzekutuar në 2006. në kuadër të kësaj mase ai ka qëndruar një javë në paraburgimin e Brindizit dhe më pas është lënë i lirë në vijim të hetimit.
