Grumbullimi i përfaqësueses U15 të Shqipërisë sheh këtë radhë një lojtar shumë të veçantë mes emrave të përzgjedhur nga trajneri Armand Dama.
Isak Aleçenu është mbrojtësi shqiptar me origjinë nigeriane, i cili është bërë pjesë e këtij grumbullimi pasi ka spikatur me ekipin e Dinamo Junior. Kjo nuk është hera e parë që futbollistë me origjinë afrikane grumbullohen për testime me përfaqësueset e moshave shqiptare, por historia e Isak është pak më e veçantë.
Babai i tij është ish-mbrojtësi nigerian Abraham Aleçenu, i cili ka bërë emër në futbollin shqiptar duke luajtur për 13 vite në vendin tonë me skuadra të ndryshme. Abraham nisi karrierën te Gramozi në vitin 2004, duke luajtur më pas me Apoloninë, Elbasanin, Tiranën, Dinamon, Vllazninë, Flamurtarin, Besën, Kastriotin, Mamurrasin, Kamzën e Laçin, ku mbylli karrierën e tij në vitin 2017.
Në kulmin e karrierës së tij, u përfol shpesh që mbrojtësi i majtë mund të ftohej të ishte pjesë e përfaqësueses shqiptare, por kjo nuk u materializua kurrë. Por tashmë i biri, i cili ka shtetësi shqiptare, ashtu si Abraham prej shumë vitesh, mund ta ketë këtë mundësi nëse vazhdon të shfaqet në nivelet më të larta në grupmoshën e tij.
