Autoriteti i Konkurrencës ka humbur në shkallën e parë të gjykimit çështjen e hapur nga njëra prej bankave tregtare në vend, që kërkonte shfuqizimin e vendimit të nëntorit 2020, për hetimin e thelluar që u krye në sektorin bankar.
Hetimi i thelluar në sektorin bankar u hap në fillim të vitit 2019 dhe përfshinte periudhën mes 1 janarit 2016 dhe 31 dhjetorit 2018. Në përfundim të hetimit të thelluar, Autoriteti i Konkurrencës pati vendosur detyrimin e Bankës Raiffeisen, Bankës Kombëtare Tregtare, Bankës Credins dhe Bankës Intesa Sanpaolo për të rishikuar drejt uljes brenda një viti nga marrja e vendimit komisionet e shërbimeve bankare për produktet e depozitave, kredive si dhe për shërbimet e transfertave e pagesave.
Gjithashtu, ato duhet të ndryshonin normat e interesit për produktet depozita dhe kredi me synim ngushtimin e marzhit midis normave respektive. Nga hetimi i thelluar i tregut të shërbimeve dhe produkteve bankare, ka rezultuar se tregjet me nivelin më të lartë të përqendrimit janë tregu i llogarisë rrjedhëse, tregu i kredisë konsumatore, tregu i kredisë kufi (overdraft), tregu i transfertave bankare hyrëse dhe tregu i transfertave bankare dalëse.
Por, bankat e prekura kundërshtuan konkluzionet e hetimit dhe tre prej tyre e paditën Autoritetin e Konkurrencës në Gjykatën Administrative, duke kërkuar shfuqizimin e vendimit në fjalë. Dy prej tyre, Raiffeisen dhe Intesa Sanpaolo, megjithatë u tërhoqën nga padia, pasi Autoriteti i Konkurrencës mori një vendim të dytë në mars 2021, ku shprehej se, nga monitorimi i tregut, i vlerësonte të përmbushura detyrimet e vendosura në vendimin e muajit nëntor.
Vendimi i muajit mars, “Mbi monitorimin e vendimit nr. 723, datë 17.11.2020”, arrinte në përfundimin se “bankat kanë miratuar ndryshime në norma interesi për depozitat, kreditë dhe komisionet e shërbimeve në përputhje me kushtet dhe detyrimet e përcaktuara në vendim dhe të painfluencuara nga vendimmarrja e Komisionit të Konkurrencës”.
Sipas AK, aktiviteti i bankave ka reflektuar kushtet e tregut vendas dhe ndërkombëtar si dhe politikat konkurruese të bankave pas monitorimit të tregut dhe komunikimit me bankat, ky institucion i vlerëson të përmbushura detyrimet e vendosura në vendimin e muajit nëntor dhe që erdhën si rezultat i hetimit të thelluar të shërbimeve dhe produkteve bankare.
Të vetmet rekomandime që AK ka lënë në fuqi në vendimin e muajit mars janë eliminimi i kostove penguese, duke lehtësuar lëvizshmërinë e klientit mes bankave, si dhe zgjerimin e gamës së shërbimeve dhe produkteve nëpërmjet platformave dixhitale.
Gjithashtu, AK vendosi sërish monitorimin e sjelljes së Bankës Raiffeisen, Bankës Kombëtare Tregtare, Bankës Credins dhe Bankës Intesa SanPaolo për një periudhë 12-mujore nga marrja e vendimit.
/Monitor.al/
