Ish-deputeti i Partisë Socialiste, Alqi Bllako kërkon lirimin nga qelia.
Blako ka depozituar në Apelin e Gjykatës së Posaçme kërkesën për ndryshimin e masës së arrestit me burg. Bllako pretendon se nuk ekziston dyshimi i arsyeshëm për kryerjen e veprave penale prej tij dhe nuk ekzistojnë kushtet ligjore për masën e “arrestit në burg”. Në kërkesë, Bllako shprehet se ai s’është i rrezikshëm dhe nuk i shmanget hetimit.
Më 29 Mars, prokuroria e Posaçme kërkoi nga Kuvendi arrestimin e Bllakos. Ky i fundit u vu në pranga pas dorëzimit të mandatit të deputetit. Megjithatë ekzekutimi i masës së arrestit me burg ndaj ish-deputetit mbetet ende i rrethuar nga misteri. Më 1 Prill, Policia njoftoi se deputeti u vetëdorëzua që prej mbrëmjes së një dite më parë. Nga ana tjetër, SPAK njoftoi po atë ditë se vendimi për ekzekutimin e masës i është dhënë strukturave të Policisë së Shtetit më 15.45, të 31 Marsit. Po ashtu, SPAK do të shprehej se i ka kërkuar policisë mbajtjen nën mbikëqyrje të Bllakos që më 30 Mars. Ndërkohë, po sipas prokurorisë, ekzekutimi i masës nga policia është bërë në 3.30 të datës 01 Prill.
Autoritetet nuk kanë arritur të bëjnë transparence mbi faktin se pse masa e arrestit ndaj Bllakos është ekzekutuar nga policia një ditë pas marrjes së urdhrit.
Në një deklaratë disa ditë më parë, ish-kryeministri Sali Berisha akuzoi se Bllako u takua me Edi Ramën para arrestimit.
Sipas prokurorisë, Alqi Bllako, ish-ministri i Mjedisit Lefter Koka dhe një vartës i këtij të fundit akuzohen se kanë paraqitur dokumente të falsifikuara për llojin e tokës ku do të ndërtohej inceneratori i Fierit. Ata ia kanë paraqitur qeverisë sikur ndërtesa e inceneratorit do të bëhej në tokë truall. SPAK ka provuar se ajo është ndërtuar në tokë arë, vlera e së cilës është më e lirë. Ky falsifikim vlerësohet se i ka sjellë buxhetit të shtetit një dëm prej rreth 140 mijë eurosh. Po ashtu, sipas SPAK, Bllako ka përfituar rreth 150 mln Lekë duke favorizuar kompaninë fituese të koncesionit të djegësit të Fierit. Paratë, sipas hetimeve, janë marrë përmes punësimit të të atit në një nga kompanitë e Klodian Zotos.
Më 2 Prill, Bllako u la nën masën e arrestit me burg nga Gjykata e Posaçme.
Disa ditë më parë, ai u mor në pyetje duke mohuar akuzat e ngritur ndaj tij.
Ish-sekretari i Përgjithshëm i Ministrisë së Mjedisit, Alqi Bllako akuzohet nga prokuroria për shpërdorim detyre dhe korrupsion në lidhje me inceneratorin e Fierit.
