Nga Marlin Muça
Deri në vitin 1989 shoqëria rumune dhe ajo shqiptare, përballeshin me të njëjtin aparat terrori që synonte supresimin e opozitarizmit në embrion dhe dënimin e të gjithë atyre që guxonin të mendonin kundër. Dy dekada më vonë Rumania është vend anëtar i Bashkimit Europian, ndërsa ne vazhdojmë luftën me të kaluarën, një të kaluar që rumunët e groposën 28 vite më parë. Arsyet pse ne jemi këtu dhe rumunët atje, janë të shumta. Arsye qe nuk mund të rradhiten lehtazi brenda një shkrimi. Ama sot, ashtu si 28 vite me parë populli ynë dhe ai rumun kemi nje aspiratë të perbashkët: Luftën kundër korrupsionit.
Protestat e ditëve të fundit në Bukuresht, që per nga përmasat tejkalojnë kryengritjet e punëtorëve të Timisoares nuk janë gjë tjetër veçse aspiratë e çdo populli për ta parë drejtësinë të vënë në vend. Nje kumt që populli shqiptar ka ditur ta bëlbëzojë, por asnjëherë ta ulerasë në sheshet e Tiranës.
Nje dekret famëkeq i qeverisë rumune që amniston një numër të madh të zyrtarëve të korruptuar, nxorri në rrugë 300 mijë njerëz, të vendosur dhe sigurt se korrupsioni dhe nepotizimi i zyrtarëve nuk luftohet vetem me reforma por edhe me miratimin e pergjithshëm të shoqërisë ndaj përpjekjes ligjore për të vendosur drejtësi. Analogjia është e qartë. Ashtu si para disa dekadash populli shqiptar dhe ai rumun ndajnë të njëjtin pasion për drejtësi që domosdoshmërishrt siguron një sistem demokratik për një shoqëri.
Reforma e miratuar më 21 korrik është në fazat e para të implementimit por duket se establishmenti i së keqes do ta ketë shumë të vështirë të heqë nga dora nga privilegjet e shumta që i ka siguruar vetes këto 25 vite të fundit. Jo më kot sulmohen SHBA-të apo përfaqësuesit e Bashkimit Europian.
Sulmet ndaj tyre nuk janë vetëm përpjekje të dëshpëruara të atyre që e dinë se fundi i një epoke korruptive është afer.Sulmet jane jehonë e dekadave përbuzjeje që politika shqiptare por jo vetëm ka patur ndaj perëndimit. Nje përbuzje që dje ishte ideologjike, ndërsa sot qëndron mbi baza të theksuara interesi korruptiv. Ndaj dhe ne si popull, si rini, si studentë nuk duhet të qendrojmë të heshtur përballë kësaj lufte që po zhvillohet.
Reforma në drejtësi, fatkeqësisht po has rezistencë tek zyrtarët e korruptuar.Tek ai korpus i së keqes që ka pushtuar ekzekutivin, legjislativin dhe gjyqesorin. Mekanizmat që ky korpus ka në duar janë të aftë ta ngrijnë reformën dhe bashkë me të dhe shpresat e të gjithëve ne për shtetin e së drejtës dhe një gjyqësor të pavarur dhe profesional.
Zgjidhja e vetme është rruga. Presioni popullor ndaj kaubojsve që duan të bëhen sherifë, ndaj atyre që duan të shpetojnë edhe njëherë nga humnera që ndan një epokë nga nje epokë tjetër. Solidariteti me sakrificen e popullit rumun dhe vigjilenca ndaj pushtetarëve që e duan reformën në drejtësi një dosje më teper në etazherin e tyre personal të reformave te dështuara, është detyrë e gjithësecilit që e do Shqipërinë , një republike të zhvilluar dhe demokratike. #ZëriIntegrimit
