Kuvendi ka miratuar me 105 vota aktin normativ për letërnjoftimin elektronik për shqiptarët. Kundër kanë votuar 14 deputetë, ndërsa një ka abstenuar.
Akti normativ nr.2, datë 02.03.2022 “Për një shtesë në ligjin nr.8952, datë 10.10.2002, “Për letërnjoftimin elektronik të shtetasve shqiptarë”, të ndryshuar” propozohet me qëllim zgjatjen e afatit të vlefshmërisë së letërnjoftimeve elektronike për shtetasit shqiptar që u ka përfunduar vlefshmëria e letërnjoftimeve dhe do të merrnin pjesë në zgjedhjet e pjesshme vendore të datës 6 mars 2022, dekretuar nga Presidenti i Republikës, me dekretin nr.13438, datë 20.1.2022, “Për caktimin e datës së zgjedhjeve te pjesshme vendore për kryetar bashkie, për disa njësi të qeverisjes vendore”.
Me 72 vota pro u miratua rezoluta ERRU për vitin 2021. Në Kuvend u miratua edhe ligji për krijimin e grupeve vendore të veprimit me 71 vota pro dhe 41 kundër.
Sakaq, projektligji për të drejtat e autorit u miratua me 71 vota pro.
