Kanë vijuar edhe sot përplasjet mes deputetëve të opozitës dhe drejtueses së seancës parlamentare, qoftë kjo kryeparlamentarja Lindita Nikolla, apo zëvendësja e saj, Ermonela Felaj, lidhur me respektimin e rregullores së Kuvendit.
Fillimisht përplasjet ishin mes deputetëve Tritan Shehu, Oerd Bylykbashi dhe Albana Vokshi, me Nikollën, të cilës i kanë kërkuar respektimin e rregullores përsa i takon rasteve kur ministrat marrin fjalën dhe replikojnë me deputetët, sa herë që duan, ndërsa deputetëve nuk u jepet më fjala.
Më pas ishte Enkelejd Alibeaj që replikoi me Ermonela Felajn për të njëjtën çështje, zbatimin e rregullores së Kuvendit.
Alibeaj i kërkoi Felajt që të zbatojë rregulloren pasi në atë karrige nuk është më e PS-së por neutrale.
Pjesë nga Kuvendi:
Alibeaj: Ja i mori edhe Fadili duartrokitjet e merituara.
Ermonela Felaj: Për procedurë të lutem
Alibeaj: Fjalën për procedurë e kam. Sa herë që ulesh ti aty ndodhin vetëm incidente në këtë sallë. Se kuptoj se cfarë frustrimi ke ti kur ulesh aty por kur je këtu je e PS-së kur je atje mundohu të tregosh që je neutral dhe zbato rregulloren. Është e drejta e parlamentarizmit replika, të kuptohet se cfarë thuhet në këtë sallë. Shyqyr që është Fadili se atë që donte të thoshte Bushati e tha ai. Bravo!
